Webblad laaste opgegradeer op 18 Augustus 2017.
AFRIKAANSE TAALDAG BOEKVERKOPING:
Afrikaanse Taaldag word elke jaar op die 14de Augustus herdenk. Daar word algemeen aanvaar dat Afrikaans sy beslag eintlik gekry het met die stigting van die Genootskap vir Regte Afrikaners (GRA) op 14 Augustus 1875 te Paarl en daarom word 14 Augustus elke jaar as Afrikaanse Taaldag herdenk.
Ons vier ook Afrikaanse boekedag op die 14de vanjaar, maar die verkoping by Kakkerlak Boeke duur vanjaar aanlyn van 14 tot 24 Augustus met ‘n fisiese verkoping op Saterdag 19 Augustus van 9vm tot 1nm te Korhaanstraat 10, Horison.
(Vir internetbestellings: Koop meer as 5 boeke (hele webblad) en kry 20% korting. Onthou ook dat posgeld apart bereken word na gelang van die gewig. Verskeie pos-opsies is beskikbaar onder andere ook koerierfasiliteite.)
Die doel van hierdie veldtog is om mense aan te moedig om op hierdie dag ’n Afrikaanse boek aan te skaf. Sodoende word die skrywers en uitgewers van ’n voortbestaan verseker.
Indien u belangstel in die R5-boeklys – kontak my op kakkerlak@mweb.co.za dan stuur ek die lys vir jou… Tot die 24ste is al daardie boeke slegs R5 elk.
Die Kakkerlak-webblad is vanjaar 10 jaar oud.
Boeke is my passie en ook die mense wat dit skryf en die mense wat by my kom kuier en koop. Al ontmoet ek meeste van julle nooit in lewende lywe nie, bly julle my na aan my hart.
Ek het baie geduld as dit kom by boeke soek.
Ek stap altyd die ekstra myl – sonder noodwendig ekstra kostes.
Dis vir my belangrik dat ek jou so gou moontlik kan help of jou brief kan antwoord. As ek nie dadelik antwoord nie, is daar gewoonlik ‘n goeie rede.
Goeie en effektiewe diens is vir my uiters belangrik – veral omdat dienslewering byna nêrens meer te vinde is nie…
Lees gerus maar hieronder hoe Kakkerlak se webblad werk.
As jy ervaar dat iets nie lekker duidelik is nie of nie vir jou werk nie, sal ek dit graag wil hoor om dit te verbeter.
1. Aanlyn-Winkel
Aanlyn-winkel is spesifiek daar gestel vir NUWE BOEKE. Alhoewel die AANLYNWINKEL reeds oopgestel is, is daar nog bittermin boeke opgelaai, maar daar sal binnekort nog boeke bygevoeg word. Hou gerus dop!
2. Nuwe kategorie (TEMAGEBONDE BOEKE) is op die spyskaart bygevoeg.
Mense vra gereeld vir lyste van jagboeke, kontreiverhale, boeke wat oor trauma handel, verhale oor die boere-oorlog en nog vele meer. Vir hierdie doeleindes het ons ‘n nuwe kategorie op die spyskaart bygevoeg naamlik TEMAGEBONDE BOEKE. Loer gerus daar… Onthou net dat hierdie net versamellyste is en dat al die boeke NIE noodwendig in die winkel beskikbaar is nie.
2. Goeie diens
Ons poog om die beste moontlike diens te lewer. Indien die boek waarna u soek NIE op hierdie webblad is nie, sal daar gepoog word om dit vir u op te spoor.
3. Hoe soek jy op die webblad?
Eerstens kan jy per kategorie soek deur ‘n naam van ‘n boek by die SEARCH-blokkie regs bo-aan elke kategorie se bladsy in te tik. Ons hoop om eersdaags ‘n soekfunksie te hê waarop u gelyktydig deur die hele webwerf kan soek. Soos wat nuwe boeke bygevoeg of afgehaal word, word die datum in rooi op elke bladsy aangedui sodat u kan sien wanneer laas is daar op daardie bladsy veranderings aangebring. Elke bladsy is veronderstel om alfabetiese lyste te bevat, maar as jy agterkom dit is nie, kliek net in die heel eerste reëltjie van bv. die OUTEUR-kolom en daardie kolom sal dan alfabeties wees. As jy meer as 10 boeke per bladsy wil besigtig, kan jy in die SHOW-blokkie aan die bokant van elke lys die syfer 10 na 50 of 100 verander wat dan beteken dat jy 50 of 100 boeke op ‘n bladsy kan besigtig.
4. Hoe bestel jy ‘n boek(e)?
Jy kan ‘n e-pos stuur na kakkerlak@mweb.co.za en daarin die boeke waarna jy soek “copy en paste” direk van die webblad – sommer die hele reëltjie (Kategorie, titel van die boek, skrywer en ook boeknommer). Dit sal ook baie help indien jy laat weet in watter kategorie / bladsy jy die boek gevind het bv. die GESKIEDENIS bladsy…
5. Tweedehandse boeke
My passie is grotendeels om te soek na Afrikaanse boeke wat uit druk is, alhoewel ek graag ook met enige ander boekinligting sal help.
6. Versending van boeke (Poskantoorpryse het op 1 April 2017 verhoog.)
a) Ek maak meestal gebruik van Fastway koeriers se dienste. Dit kos R60 per A4-grootte sak landswyd, R70 per A3-grootte sak en R50 vir ‘n “local” sak wat vir Johannesburg en omgewing. Fastway besoek die meeste dorpe en in geval van sommige afgeleë plekke kos dit R125 vir aflewering.
b) NUWE DIENS vir verafgelee plekke via PARGO koeriers. Hierdie koeriers lewer af by Caltex vulstasies, Clicks winkels of by samewerkende videowinkels en selfs OK winkels. Hang van elke dorp af. Dit kos R90 en die voordeel hiervan is, jy gaan haal die pakkie op jou eie tyd af sodra jy ‘n sms kry dat jou pakkie aangekom het.
c) Anders pos ek dit graag via die poskantoor. In meer as 8 jaar het ons nog nooit ‘n boek verloor deur die poskantoor se diens nie. Elke pakkie het ‘n unieke spoornommer wat op www.parceltrack.co.za gevolg kan word. Pakkies word geweeg en kos R60 vir 1 kg pakkies en soos dit swaarder word, betaal jy meer na gelang van die gewig van die toegedraaide pakkie.