Prof. M.C. van Zyl beskryf in hierdie werk vir die eerste keer die geskiedenis van die vroegste Van Zyls in Nederland tot met die aankoms van Willem van Zijl, stamvader van die Van Zyls in Suider-Afrika, aan die Kaap in 1699. Op ‘n onderhoudende wyse verstrek hy belangwekkende gegewens oor die herkoms van die Van Zyl-familienaam, hul adelike verbintenis en hulle sosiale, ekonomiese en militêre bydraes in Nederland. Die herkoms van Willem, sy troue met die stammoeder Christina van Looveren in Amsterdam, sy toetrede tot die diens van die V.O.C. en sy vertrek na die Kaap word interessant beskryf. Prof. Van Zyl kon ook vir die eerste keer presies vasstel wanneer Willem en sy vrou by die Kaap aangekom het – iets waaroor historici en genealoë tot dusver in die duister was.