Grisjka, die seun van die hoofman van ‘n jagterstam in Siberië, het ‘n beervriend, Djidi. Dié twee is onafskeidbaar en het ook al baie lief en leed gedeel. Op een van sy jagtogte die berge in, hoor Grisjka geweerskote en ‘n gewonde beer storm op hom af. Hy ontwyk die dier naelskraap, maar dan word hy van ‘n nuwe gevaar bewus. Hy hoor die sagte geknars van voetstappe op die sneeu. ‘n Paar oomblikke later klap ‘n koeël teen ‘n boom vlak by hom vas.

Dit is die begin van ‘n kommervolle tyd: die naburige stam het oor die berge gekom om te kom oorlog maak. Dis ‘n sterk stam en hulle word geleid deur die onverskrokke Ajoki, wat vir niks stuit nie. Trouens Ajoki is baie soos Grisjka self! Grisjka se se stam word verswak deur die dood van hul hoofman en deur tweespalt in hul geledere. En dan is daar ook nog die verrassende onthullings oor Grisjka se verlede…

In hierdie boek het die Grisjka wat ons in Grisjka en sy beer en Grisjka en die wolwe leer ken het, ‘n man, dapper vegter en sterk leier geword. In die wilde gevegte is hy op die voorpunt, sy geweerkoeëls en pyle word met oorleg afgeskiet en hy skroom nie om belangrike besluite te neem wat verreikende gevolge sal hê nie.

Van die drie boeiendste boeke oor Grisjka en sy beerbroer, is Grisjka se merk seker die spannendste en avontuurlikste. Vir lesers van ongeveer 10-12 jaar sal dit ook ‘n gepaste afsluiting wees van die genotvolle stukkie pad wat hulle met die seun en die Bere kon saamloop…