Daar is drie toilette in die sentrum se damestoiletgeriewe. Die eerste een is beset, en ek gebruik die tweede toilet. Toe ek die deur oopmaak nadat ek klaar is en al my klere weer op hul regte plekke is, staan daar skielik ’n onbekende man voor my. Ek sien onmiddellik die haat in sy lyf en in sy oë. My eerste oorblufte gedagte is dat ek per ongeluk in die manstoilette beland het, maar nee, ek sou mos nie … Voordat ek iets kan sê of doen, stamp hy my met geweld agtertoe sodat ek lomp en hard plat op my boude terug in die hokkie val. My kop stamp teen die toiletring. My rug stamp teen die voetstuk van die toilet, wat nog spoel en spoel en spoel … My handsak met die rewolwer in val ver van my af weg. Ek sien sy blitsvinnige bewegings en sy aggressie, dit spring uit sy lyf …

Al die bloed in my lyf stol.