Wanneer vier stadskinders se ouers skielik genoeg geld het om ‘n beesplaas te koop, is dit gewoonlik die begin van vele en groot avonture. Met die jong Nels – Magiel, Mias en die tweeling Nelie en Egbert – was dit natuurlik ook die geval. Maar op die plaas Grotkoppie, wat vroeër aan ‘n skatryk kluisenaar behoort het, was daar boonop ‘n versteekte skat. Magiel en die tweeling is die avontuurlustiges wat kliphard skat soek, maar Mias is anders. Hy het ‘n liefde vir die grond en glo sy skat sal hy in die groentetuintjie en hoenderboerdery vind.

Daar volg terugslae, maar elkeen se soektog na sy eie skat gaan voort. Wie gaan die wedloop wen en eerste ‘n skat vind? Die antwoord op hierdie vraag lê iewers in hierdie lewendige verhaal weggesteek tussen die vlermuise, geraamtes, spoke, kopbene, murasies… en ‘n kluisernaar se ou geroeste graaf!