Jan-Daniël is diep ongelukkig. As dorpseun kan hy maar nie sy voete in die stad vind nie. Hy verlang steeds na sy ou skool en vriende. Daarby voel hy dat hy en sy ouers al verder van mekaar af wegdryf. Op hulle aandrang willig hy teësinnig in om ‘n projektoer na die Cederberge te onderneem saam met drie ander st. 7-seuns en hul onderwyser.

Uit die staanspoor loop dinge skeef. Die seuns se geaardhede verskil baie en misverstande ontstaan wat die spanning laat oplaai. Om alles te kroon ontmoet hulle vir Liesbet, wat gou ‘n sagte plekkie vir Jan-Daniël ontwikkel.

Die pragtige natuurskoon en die vaderlike leiding van die onderwyser help om die gemoedere te kalmeer. Op hulle staptogte ontdek die seuns grotte met Boesmantekeninge. Hulle leer ook om van die veldkosse te leef. ‘n Belangrike ontdekking in een van die grotte laat hulle tydelik van hul struwelinge vergeet.

Maar kort voor lank vlam die gevoelens weer op. Dié keer lyk ‘n botsing onvermydelik. Selfs die natuurelemente werk saam om die saak op die spits te dryf. Terwyl die verwoestende vlamme die bome en bosse op die berg verteer en die diere beangs laat vlug, kom Jan-Daniël voor ‘n beslissende keuse te staan…